أفلام الديجيتال القصيرة فى مهرجان الأسكندرية السينمائى الدولى


حلم اسطبل عنتر .........فى مهرجان الاسكندرية السينمائى الدولى

النهاردة كان يوم تحفة.... روحت المركز الثقافى الفرنسى كان بيتعرض هناك الأفلام التسجيلية والوثائقية والروائية القصيرة المشاركة فى مهرجان الأسكندرية السينمائى - اه هو أنا ما قولتش لكم ان السينما دى اهم حاجة فى حياتى وانى كنت ومازلت بحلم بدراسة الأخراج السينمائى ؟ دى معلومة لازم تعرفوها حبى للسينما خلانى خسرت حاجات كتير وكسبت برضه حاجات اكتر- ماعلينا- اتفرجت على شوية أفلام حلوين اوى احلى حاجة فيهم انهم لشباب لسة بيبتدوا ما قعدوش يحلموا وبس- زى حلاتى -نفذوا حلمهم وخلوه واقع ملموس برافو عليهم والله وربنا معاهم
مش حقدر اتكلم عن كل الأفلام طبعا حختار اكتر فيلمين عجبونى- مع العلم انى فاتنى كذا فيلم لظروف خارجة عن ارادتى
الفيلم الاول: حلم اسطبل عنتر ..... اخراج: يوسف هشام
فيلم تسجيلى بيتناول حياة احد فئة المهمشين وهم اهالى اسطبل عنتر. تناول المخرج حياتهم ومشاكلهم وظروفهم القاسية
الفيلم بدأ بسؤال لمجموعة من الناس وهو بتحلم بأيه ؟؟؟ كل واحد قال بيحلم بأيه وبعدين دخل على ناس اسطبل عنتر ما سألهومش بتحلموا بأيه خلى مشاهد يشوف كمية المعاناة اللى عايشين فيها والفقر اللى خلاهم يبيعوا حتى اعضاءهم ليستنتج ان حلمهم اكيد حيكون انهم يعيشوا !!!! وبس
فى ناس فى مصر - اللى عدد العربيات المرسيدس فيها اكتر من عددها فى المانيا نفسها واللى فيها قصور مارينا واليخوت الخاصة والأطفال اللى بيمشوا بحرس خاص - حياتهم بائسة جدا ليس لديهم اى مرافق ولا امكانيات تساعدهم على الحياة مش لاقين حتى مايه يشربوها مش لاقين شغل يدخل لهم خمسة او عشرة جنيه فى اليوم ودة اقصى ما تمنوه....... طبعا عناصر الفيلم الاخرى من موسيقى وتصوير وصوت ومونتاج........ ألخ . هايلة جدا بالنسبة لشباب صغار لسة مبتدئين



أزرق وأحمر وأخف دم أباحة فى الدنيا

اما الفيلم الثانى: أزرق وأحمر ...... اخراج : محمود سليمان
وبصراحة بهنىء مخرج الفيلم على جرأته وخفة دمه . الفيلم تحفة ودمه خفيف بالرغم من تضمنه الكثير من الأباحة والألفاظ الخارجة لكن برضه تحفة ودمه خفيف. انا بحب هذا النوع من الأباحة الغير مبتذلة كأباحة استاذى العظيم يوسف شاهين فى أفلامه
الفيلم قصته بتدور حول شاب يحب فتاة ويقيم معها علاقة جنمسية وفى احدى المرات لم يتوخى الحذر بسبب سقوط السرير أثناء العلاقة فأضطر للقذف بداخلها .... خافوا من حدوث حمل وبدأوا يفكروا كيف يتصرفوا لمنع حدوث هذا الحمل ................ ولن أكمل ماذا حدث لتشاهدوا الفيلم بنفسكم.... ما اود ذكره انه اثناء محاولاتهم - وهنا يتضح مغزى الفيلم - ينكشف للمشاهد أننا نحيا فى مجتمع ملىء ببلاوى سودة ومتخفى وراء ستار الفضيلة والدين وهو يملاؤه الكذب والزيف وبداخله الكثير من الأنحراف والعلاقات الخاطئة ولكن الكل يلبس أقنعة ليحاول اخفاء الحقيقة والظهور بمظهر القديسين فى الأرض
طبعا اداء العبقرى الجميل باسم السمرا كان رائع كالعادة والممثلة الشابة ريم حجاب لم تقل مستوى عنه والمخرج استطاع اضفاء البسمة على المشاهد بالرغم من تراجيدية القصة والاجمل احساسك بسخونة المواقف والساسبنس فى الفيلم ....... عجبنى اوى اوى

Comments

Anonymous said…
متابعة جيدة اهنيكي عليها .. بالنسبة لفيلم حلم اسطبل عنتر .. احب اقول انه بجد يستاهل جايزة الفيلم التسجيلي عن جدارة .. ولو مخدهاش تبقي فيه مقاييس اخري
ازرق واحمر ..حظي معاه وحش كل ما يكون هيتعرض تحصل حاجه ومشفهوش

تشكرات
Ahmed Shokeir said…
مازالت الأفلام التسجيلية لها بريقها الخاص وثقافتها العالية التي تعمل بتركيز شديد على قضية معينة بصورة غير مباشرة تعمل على تحريك الفكر ، المشكلة هي عدم توافر أماكن تعرض تلك السينما بشكل مستمر

فثقافة مشاهدة السينما التسجيلية تحتاج لمجهود جبار لجعلها هدف يسغى وراءه كثيريون لمشاهدته وفهم لغته العالية

داليا مبروك المدونة بشكلها الجديد
وحاسس ان ليها خط متميز وعميق في قضايا ساخنة
ربنا يخليك يا أحمد يارب ودايما اكون عند حسن ظنك بس تتابعنى وتقولى رأيك بأستمرار

Popular posts from this blog

شوفتوا المدارس الأمريكانى ؟؟

...... توضيح بسيط

!!! ظلمنا الضباط المرة دى